KSU-in HPC thil phut an duh lo

Meghalaya-a Khasi Students' Union (KSU) chuan Harijan Panchayat Committee (HPC) in Shillong-a Punjabi Lane aṭanga sawnchhuah tur chhungkaw tinte chu ram pe tura Meghalaya sorkar an phutna chu an duh lo tih sawiin, sorkarin a pek ang chu pawm mai turin an ti.

Shillong-a press conference an neihah, KSU president Lambok Marngar chuan state sorkar hnenah HPC thil phut chu pe lo turin a ngen zui bawk.

Shillong-a Punjabi Lane-a chengte leh Meghalaya sorkar hnuaia High Level Committee chuan he lane-a chengte sawnchhuahna turah hian inremna an siam tawh nia sawi a ni.

Hetih lai hian HPC hian Punjabi Lane aṭanga sawnchhuah an nih chuan, he hmuna cheng chhungkaw tin chu ram, square feet 2,000-a zau tal pe ṭheuh turin an phut a ni.

Margnar chuan HPC-te chu sorkarin ruahmanna a siamsak tawh a, an awmna tura a ruatsakah chuan ṭha taka insawn mai turin a chah a ni. "Thil tithei tak nia inngaiin thil phut an nei tur a ni lo. Hetianga an ti chhunzawm zel a nih chuan, keini lam pawh loh theih loha kan chet chhuah a ngaih hun a awm ang. Zaidawh taka kan awm lai hian, boruak tha tak siam an duh lo hi a ṭha zawk a ni," tiin Margnar chuan a sawi.

KSU chuan dan loa awmte chu rang taka sawnchhuah nghal mai chu an ngaihdan a nih thu an tarlang.

KSU general secretary Donald Thabah pawhin HPC-te thil phut chu sorkar lamin a ngaihven a nih chuan boruak a ṭha lo chho dawn tih a sawi. "Sorkar chu an phut angin a awm tur a ni lo a, a awm a nih chuan boruak a alh chho mai ang. KSU chauh ni lo, tualchhung mite ngei pawhin an duh lo a ni. State-ah buaina a chhuah phah thei dawn a ni," a ti. "Leilung fa ngei zingah pawh ram nei lo an awm lai a, HPC-in Punjabi Lane-a cheng chhung tin tana ram, sq feet 2,000 a phut hi thil pawm theih loh a ni," tiin HPC hi Punjab rama awm chu ni se a hma daihin sawnchhuah a ni tawh ang, Meghalaya mipui leh sorkar chuan zah an ngai zawk a ni, a ti.

Meghalaya state pawn lam pawl ṭhenkhat, Punjabi Lane-a chengte lo vuipui a, lo inrawlhte chu an ngaihtuah tak tak a nih chuan HPC member-te chuan an state-ah hruaiin, an thil phut ang chu pe mai turin KSU chuan an ti bawk.