Tripura : Ruihhlo do hna kalpui dan report dik tak pe turin CPIM in phut

Tripura chief minister Biplab Kumar Deb-a'n Tripura police-ten ruihhlo do hna beihpui thlak hlawhtling tak an kalpui dan report a tihchhuah, CPIM state secretary Jitendra Chowdhury chuan an hlawhtlin dan report chu dik taka pe turin a phut.

Police report chu siamchawp mai nia puhin, Chowdhury chuan state sorkar chuan ruihhlo khuahkhirhna kawnga an hlawhtling tak tak nia a ngaih chuan chiang takin a tarlang tur a ni, a ti. State sorkar leh CM Deb chu chhui chiang a, data dik tak lakhawm se la, thil awm dan chu chiang takin a rawn lang dawn a ni, tiin a sawi.

"Ganja, brown sugar leh ruihhlo dangte chu eng zat chiah nge an man? Thalai zingah ruihhlo hmansual avanga an nun tichhia eng zat nge awm. Sorkar chuan engkim chiang takin a sawilang tur a ni a, mipuite chuan thil awmdan dik tak an hriat a ngai a ni," a ti.

Police-te hlawhtlin dan report chu a pawm lo tih sawiin, "Heng data te hi belhchian dawl lo, phuahchawp mai a ni. Home minister ni bawk, Chief Minister-in social media lama a tarlan hi police department-a data siamtuten an siamchawp mai a ni," tiin a sawi.