KSU-in ILP chungchangah PM inrawlh turin an ngen

Khasi Students' Union (KSU) chuan an state-a Inner Line Permit (ILP) system hman phutin prime minister Narendra Modi hnenah memorandum an thehlut a, a taka kalpui a nih thuai theihna tura inrawlh turin an ngen. 

PM hnena memorandum an thehluhah KSU chuan, "Meghalaya-a ILP chu a ram leilung fate humhalhna leh hmasawnna tur a ni tih sawiin, boruak ṭha leh muanawm a awm theihna tur a ni," tiin an ziak. Megha­laya chu Tripura leh Assam ang maia pem lutte an chimralna state a ni mai dawn tiin, ILP hman thuai an phut chungchang an sawifiah. 

Khasi Students' Union chuan, chuan Citizenship Amend­ment Act (CAA) chungchang chu ngaihtuah ṭha leh turin memorandum an thehluhah hian an tarlang bawk Assam-Meghalaya ramri buaina chinfel sak tur te, Constitution 8th Schedule-a Khasi ṭawng telh tura ngenna pawn an ziak tel bawk. 

Eptu pawl, Congress party chuan sorkar laipuiin an state-a Inner Line Permit (ILP) system hman tumna a tihkhawtlai sak zel chungchangah na zawka nawr an tum tih an sawi bawk. 

Opposition Chief Whip, PT Sawkmie chuan, "ILP hmanna tura Meghalaya Legislative Assembly-in resolution a lo pass tawh chu zah a, pawmpui thuai tura kan phut thu ziakin kan thlen dawn a ni," a ti. 

Sawkmie chuan Assembly-a ILP hmanna tur resolution pass phawt tura hrilhtu pawh union home minister Amit Shah ngei a ni tih sawiin, nikum December-ah pass a ni tawh chungin sorkawr laipui chuan tun thlengin a ngaihven zui lo a ni, a ti. 

State mipuite mamawh leh duhdante chu zahsak turin sorkar laipui an phut tih a sawi.