Hmarchhak bialah hel chetna 80% in a tlahniam : MHA

Ministry of home affairs (MHA) in annual report a tihchhuahah, kum riat liam ta chhungin hmarchhak bialah sorkar laka hel zawnga chetna chu 80% in a tlahniam a, hel laka security force thihna thleng 75%leh civil mi thihna thleng 99% in a tlahniam bawk a ni, a ti.

Kum 2014 aṭang khan hmarchhak secuirty dinhmun chuan hma a sawn chho hle nia tarlangin, kum 2020 kha hel chetna thlen tlem ber kum leh, kum 20 chhunga hel kuta security force leh civil mi thi an tlem ber kum a ni tih a tarlang.

"Kum 2014 nen khaihkhin chuan, kum 2020-a hel chetna thleng hi 80% zetin a tlahniam a ni," tiin kum 2020 hian a hma kum, kum 2019 aiin hel chetna hi 27% in a tlahniam a, civil mi leh security force mi thi zat pawh 72% an tlem zawk bawk niin report chuan a tarlang a ni.

Kum 2020 chhungin hmarchhak bialah hian hel 21 kahhlum niin, mi 646 man an ni a, ralthuam 305 man a ni bawk. Hetih lai hian helpawl hrang hrang aṭangin mi 2,644 chu an ralthuamte nen sorkar kutah an inpe.

Hmarchhak state zingah Mizoram, Sikkim leh Tripura-te chu a ralmuang hle a, state dangah pawh boruak a ṭha chho mek a ni. Kum 2019 nena khaikhinin, kum 2020-ah khan Arunachal Pradesh-ah hel kaihhnawiha pawikhawihna thleng chu 42% a tlahniam a, Assam-ah 12%, Manipur-ah 23% leh Nagaland-ah 45% in a tlahniam tih report chuan a tarlang bawk.