Imphal-ah North East Regional Sports Week hawng

Manipur khawpui, Imphal-a Khuman Lampak Sports Complex main stadium-ah Ningani khan Azadi Ka Amrit Mahotsav lawmna pakhat, North East Regional Sports Week chu hawn a ni.

Regional Sports Week hi Manipur sorkar hnuaia Youth affairs and sports department buatsaih niin, North Eastern Council (NEC) in a pui a ni.

Sports Week hi May 3 thleng neih a ni dawn a, Manipur bakah hmarchhak state dang - Assam, Arunachal Pradesh, Mizoram, Nagaland, Sikkim leh Tripura aṭanga infiammi kalte chu archery, badminton, boxing, football leh table-tennis ah an intihsiak ang.

Chief minister N Biren Singh chuan state dang aṭanga infiammi kalte chu lo lawmin, hmarchhak state te puala sports week buatsaih thlengtu an ni chu an inchhuang hle tih a sawi. Manipur sorkarin Manipur Olympian Park a siam mek thu leh, he hmunah hian Manipur Olympian-te lim dah vek an ni dawn a, an state aṭanga infiammite cho phurna atan leh, Manipur chu 'powerhouse of sports' a nihzia lantir a ni dawn a ni, a ti.