Meghalaya-in gambling legalise a tumna pawl hrang hrangin dodal

Meghalaya sorkarin an state-ah khualzinte tan bik gambling leh online betting phalsak a tumna chu pawl hrang hrangin an dodal a, dodaltu zingah hian pawl lian tak, Meghalaya United Christian Forum (MUCF) pawh an tel.

MUCF secretary Synshariang Kharshiing chuan gambling, online betting leh casino-te hi phal a nih chuan, ṭhalaiteah nghawng ṭha lo tak a nei ngei dawn a, hei hian chhungkua, hnam leh sakhua thlengin a nghawng thei dawn a ni, a ti.

Online gambling leh casino hmang chuan sorkarin sum tam tak a lalut thei ngei ang a, mahse khawtlang nuna a nghawng tur chu zawhna lian tak a ni tiin, ṭhalai leh ṭhangtharten a chhiatpui theih dan turte ngaihtuah chiang loin sorkar leh hotute chuan thutlukna hi an siam mai tur a ni lo, tiin a sawi.

Pawl dang ṭhenkhat pawhin sorkar chu a thutlukna lo siam tawh hi ngaihtuah ṭha leh turin an phut bawk.

Meghalaya law and taxation minister James K Sangma chuan kar liam ta khan state sorkarin khualzinte tan bik casino leh online gambling phalsak a tum thu hi a lo sawi tawh a, hei hi sorkarin sum a lakluhna tur ṭha tak a ni, a ti. Mahse Meghalaya-a chengte tan erawh phal a ni ve dawn lo tih a sawi.