Assam-ah Hri kai 5,000 chuang tawh
Assam-ah Covid-19 kai mi 249 hmuh belh an ni leh a, hri kai hmuh tawh hi mi 5,255 an awm tawh a ni.
Health minister Himanta Biswa Sarma chuan Inrinni zan khan dar 11.55 khan hri kai 249 hmuh chhuah belh an nih thu hi a sawi. Hri kai hmuh tawh zinga mi 3,202 chu enkawl dam an ni tawh thung a, enkawl mek mi 2,041 an la awm.
Minister chuan state sorkarin hri darh tur venna atana a tam thei ang ber test neih sak a, a bikin Guwahati khawpui chhungah mi 50,000 test neih sak tum chu kalpui chhunzawm zel a ni tih a sawi. Sorkarin a theih anga tam test neihpui a tum rualin, mipuite chu theihtawpa lo inveng fimkhur a, inenkawl ṭha turin a chah nghal bawk. June 20 thleng khan sample 273,047 test a ni tawh tih a sawi.
Haflong-ah frontline worker-te chawimawi
Hri leng dona kawnga a hmatawng; frontline worker 50-te chu Haflong-ah an hnathawh leh inpekna avangin chawimawi an ni.
Programme hi Haflong Welfare Association buatsaihin Haflong Civil Hospital-a conference hall-ah an hmang a ni. Doctor, nurse, lab techician, ambulance driver leh cleaner-te chu thilpek an hlan. He hun hi North Cachar Hill Self-Government Council TT Daulagupu, district health department joint director Dr Dipali Barman bakah hospital hotuten an hmanpui.