South Garo Hills-ah sum-dawng mi pathum rubo

Meghalaya, South Garo Hills-a Telekhali Forest Reserve area aṭang­in sumdawng mi pa­thum-te chu Thawh­lehni khan rukbo an ni.

He thil thlenna hmun hi South Garo Hills-a Dumnikura thingtlang khaw bul a ni a, India- Bangladesh border aṭanga hla lo te a ni. Sumdawng mi 11-te hian kartina an tih ṭhin danin, West Garo Hills-a Dalu aṭangin bazar turin Jadugre an pan a, kawng lakah ralthuam kengte chuan lo tidingin mi pathum an rubo zui ta a ni. Superintendent of police (SP) Anand Mishra chuan, hel silai kengte chuan sumdawngte chuanna hi an lo tiding a, an zinga pariat te chu an tlanchhe hman a, midang pathumte chu hren zui an ni ta tih a sawi.

He thil thleng hi eng pawl mahin an tih a nih thu an la chhal lo a, hel zawn hna hi thawh nghal a ni. Police-te chuan Tura - Dalu - Baghmara inkar kawng te chu hel chet hluarna hmun a nih thu an sawi a, nikum November pawh khan Assam-a sumdawng mi 10 zet te chu rukbo an lo ni tawh a ni, an ti. Nikum September vek khan, Assam-a sumdawng mi pariat te chu South Garo Hills-a Chokpot aṭangin rukbo an lo ni tawh a, tlanna sum pek an nih hnuah chhuah leh an ni.

Hetih lai hian Megha-laya sorkar leh sorkar laipui ṭangkawp chuan Garo Hills huamchhungah hian hel dapchhuah beihpui an thlak a, kum 2016 chhung khan hel mi leh sa 150 zet chu sorkar kutah an inpe a ni.