Vibrant Gujrat Global Summit-2017-ah AP tel
Vibrant Gujarat Global Summit-2017-ah Arunachal Pradesh chuan dawr a hawng a, hmarchhak aṭanga tel awmchhun an ni.
Prime Minister Narendra Modi chuan Thawhlehni khan Vibrant Gujarat Global Summit-2017 hi a tlawh a, dawr hrang hrang a fang kual a, Gujarat Chief Minister Vijay Rupani chuan a zui ve bawk. Modi chuan hmarchhak aṭanga tel awm chhun Arunachal sorkar hmalakna chu fakin, Chief Minister Pema Khandu leh Deputy Chief Minister Chowna Mein-te hmalakna chu fakawm a tih thu a sawi. Arunachal sorkar chuan dawr pakua a hawng a, hengah te hian organic, horticulture, heritage, textile leh culture pholang thei thil te phochhuah a ni.
Vibrant Gujarat Global Summit hi Gujarat-a business summit lian ber a ni a, kum 2003-a Modi-a Gujarat chief minister a nih aṭang khan kalpui ṭan a ni. Kumin bikah hian palai 6,000 vel zet an tel a, sawm bik zingah Kenya President Uhuru Kenyatta, Portugal Prime Minister António Costa, Russia Deputy PM Igor Ivanovich Shuvalov leh Poland aṭangin Mateusz Jakub Morawiecki-te an tel a ni. He summit-ah hian cheng vaibelchhe nuai 30 hu inremna ziah beisei a ni.