Taj Mahal luh dawnah Manipur zirlaiten harsatna an tawk

Manipur-a Central Agricultural University zirlaite chu Taj Mahal luh dawnah dan an ni a, India khua leh tui an nihna tilang phawt tura tih an ni.

Manipur zirlaite hi all-India educational tour neia kal an ni a, Pathianni khan zirlaite hian Taj Mahal an tlawh a, mahse a chhung an luh dawnah Central Industrial Security Force (CISF) duty-te chuan an lo dang a ni. Taj Mahal tlawh tur hian ram dang khualzinte chuan cheng 1,000 an chawi a ngai a, India khua leh tuite tan chuan cheng 40 chauh chawi a ngai thung. Manipur zirlaite hi CISF-te chuan India khua leh tui an nihna tilang thei hmuh tir turin an phut a, Aadhaar card-te pawh an dil nia sawi a ni. An zinga pakhat chauhin Aadhaar card a neih avangin hun rei tak chhung tihkhawtlai an ni a, a hnuah tourism police-te pawmpuinain an lut theih chauh a ni.

Central Agricultural University zirlaite chuan CISF mi leh sa te chu an che hleihluak hle niin an sawi a, India khua leh tui an nih ngei thu an sawi hnuah pawh an awihsak duh lo niin an sawi. Zirlaite chuan tourism police-ah an zualko tih sawiin, anni puihna zarah Taj Mahal chhung an lut thei chauh niin an sawi. He thil thleng chungchang hi Archaeological Survey of India (ASI) chuan chhui chiang nghal turin Thawhṭanni khan thupek a chhuah.