Nagaland : NPF MLA 21-in NDPP an zawm

Nakkuma assembly inthlan hmabak, Nagaland-ah Naga People's Front (NPF) MLA 25 zinga 21-te chuan kar liam ta Zirtawpni khan chief minister Neiphiu Rio kaihhruai, National Democratic Progressive Party (NDPP) an zawm, an zingah hian NPF legislature party leader TR Zeliang pawh a tel.

An party zawm tharte nen hian NDPP hian member 60 awmna state assembly-ah hian MLA 42 a nei ta a ni.

NDPP thupuangtu, Meretoshi Jamir chuan, "Chief Minister Neiphiu Rio leh a kaihhruai sorkar tichakna turin, NPF MLA 21-te chu NDPP-ah an inchhung lut a ni," tiin MLA-te hi an lo awm thu leh, party dangte pawh kawng an hawn reng thu a sawi.

Nagaland-ah hian eptu pawl awm lohna, CM Rio kaihhruai United Democratic Alliance (UDA) sorkar a ding mek a, UDA-ah hian NPF MLA 25, NDPP MLA 21, BJP MLA 12 leh independent MLA pahnih an tel a ni.

NDPP, BJP leh independent MLA-te hian People’s Democratic Alliance (PDA) hming ṭangrual sorkar an siam a, NPF hi eptu lamah a awm ṭhin. Mahse kum 2021 khan NPF hian Naga political issue rang zawka chinfel a nih theihna turin eptu lamah awm tawh lo a, sorkar hi zawm an tum thu an puang a, hemi hnu hian all-party government hi dinin, PDA chu UDA-te thlak a ni zui ta bawk.

NPF president Dr Shürhozelie Liezietsu chuan MLA 21-te chu uire nia sawiin, NDPP an zawm chungchang chu anmahni duhthu tih a ni a, all-party sorkar hnuaia minister chanpual leh chairman dinhmun chu NPF chan chhunzawm tir a phut thu a sawi.