Assam-ah bawng pualin ambulance service siam

Assam-a Dibrugarh district-ah bawng dam lo leh hliamte phurhna atana ambulance service siam chu kar liam ta khan hawn a ni.

Bawng tana ambulance service siam hi Gopal Gaushala-in a enkawl dawn a, he service hi Dibrugarh deputy commissoner Biswajit Pegu chuan a hawng a ni. He district-ah hian kum 2020 khan bawng tan hian hospital siam a lo ni tawh bawk.

Pegu chuan, "Ambulance service hian bawng dam lo emaw hliam tuarte emaw chu rang zawka enkawl an nih theihna turin a pui thei dawn a ni. Hetianga bawng enkawlna tur changtlung zawka siam chhoh a ni zel hi a lawmawm hle," a ti.

Gopal Gaushala president Nirmal Beria chuan hmarchhak bial pumah bawng puala ambulance service siam hmasak ber a nih thu sawiin, bawng dam lote phurhna kawngah harsatna an neih fo avangin ambulance service hi siam a nih thu a sawi.