FASTOM-in Meghalaya sorkar kar 1 hun an pe

Federation of All School Teachers Of Meghalaya (FASTOM) chuan Meghalaya sorkar chu an thil phut tihhlawhtlinna turin kar liam ta Zirtawpni khan kar khat chhung hun an pe tih an sawi.

FASTOM hian ad-hoc teacher-te chu deficit sytem-a hlangkai tur leh, an hlawh pawh tipung turin state sorkar hi an phut a, thla hnih dawn nawrh an huaihawt tawh a ni. FASTOM general secretary Andrew Lyngkhoi chuan education minister Lahkmen Rymbui an hmuhnaah, minister chuan ring ngam tur leh sorkar thawhpui zel tura a ngen thu a sawi niin a tarlang. Sorkar chu an thawhpui zel dawn a, mahse an thil phut tihhlawhtling tura nawr erawh an chhunzawm tur thu a sawi a ni.

Hun an pek chhunga state sorkarin an thil phut a tihhlawhtling lo a nih chuan, nasa zawkin sorkar nawrna atan hma an lak tur thu a sawi bawk. An thil phutte chu sorkarin a pawmsak a, ziak ngeia a remtihpuina a pek an phut tih an sawi.