Sikkim eptu party-ten Covid-19 data felfai tawk loah puh
Sikkim-a epty party-te chuan state sorkarin nitina Covid-19 data a tihchhuah ṭhin chu a felfai tawk lo nia sawiin, thil awmdan dik tak tichiang turin an phut.
Sorkarin Covid-19 data a tihchhuahah, Zirtawpni liam ta thleng khan an state-ah hri kai hmuh chhuah tawh mi 70 awmin, an zinga 21 chu enkawl dam an ni tawh a, damdawiin aṭangin chhuahtir tawh nia tarlan an ni. Mahse a hma lama data a lo tihchhuah tawh aṭangin thil inmil tawk lo a awm tih eptu party-te chuan an sawi.
June 11-a state health department-in swab sample test tawh zat nia a tarlan chu 6,618 a nih laiin, June 12-ah test tih tawh zat chu 5,157 chauh a ni thung tih an sawi. Pradesh Congress Committee of Sikkim president Bharat Basnet chuan sorkarin Covid-19 data a tihchhuah chu a rintlak tawk lo nia sawiin, all-party meeting koin sawiho ni se chuan an dinhmun pawh a ziaawm zawk tur thu a sawi.
Hri kai dam tawh chungchangah pawh sorkar data chu a rintlak tawk nia sawiin, June 16-a official data-ah mi panga an dam niin tarlan a ni a, mahse June 17-ah chuan enkawl dam, hospital aṭanga chhuah tir hi mi pali tiin tarlan a ni leh thung. Sikkim Democratic Front (SDF) leh Congress chuan sorkar data chu a ngaih pawimawh tawk lo a ni, an ti.
Hetih lai hian nodal officer for Covid-19 Kaden Zangmu chuan June 12-a official data tihchhuahah Siliguru, West Bengal-a North Bengal Medical College and Hospital (NBMCH)-a sample test chu dah tel a nih loh vang tih a sawi.