Hmarchhakah digital transaction kalpui tura hmalak mek a ni : DoNER Minister

Union Minister for Develop­ment of North Eastern Region (DoNER) Jitendra Singh chuan, hmarchhak state pasarih-ah digital transaction kalpui tura hma lak mek a nih thu Nilaini khan a sawi.

DoNER minister Jitendra Singh chuan, "Pawisa note lian pahnihn tih thih a nih hnuah, digital transaction kalpui turin chak taka hma lak nghal a ni" tiin ni hnih awh Digi Dhan Mela, Guwahati-a neihah a sawi. Tea garden-a hnathawkte hmakhua ngaihtuaha hma lak a nih thu sawiin, an hamṭhatna tur kawng hrang hrang ngaihtuah sak an nih thu a sawi a, Rs 500 leh Rs 1,000 note tih thih a nih hnuah, pawisa note lem Pakistan aṭanga lo lut a awm niin a sawi bawk.

He hun hmanpuitu Union Minister of state for Home Affairs Kiren Rijiju pawhin thu sawiin, India chu digital country-ah puan a nih thuai dawn a ni, a ti. Hmarchhak state-te chuan hemi kawngah hian chanvo pawimawh tak an chang tih sawiin, ram hmasawn nana ṭanrual a ngaih thu a sawi bawk. Assam Chief Minister Sarbananda Sonowal chuan he hunah hian ‘Toka Paisa’ a tlangzarh nghal a, hei hi cashless economy atana thil pawimawh tak niin a sawi. Prime Minister Narendra Modi chuan Jan Dhan account nei mi vaibelchhe 25 chuang an awm tawh thu a lo puang tawh a, hei pawh hi digital transaction atana thil pawimawh tak a nih thu tarlan a ni bawk.

Assam khawpui Guwahati-a Digi Dhan Mela neih hi state sorkar leh I-T Department bakah Niti Aayog ṭangkawp ten an buatsaih a ni a, digital transaction kalpui meka hmalakna pakhat a ni. Mela-ah hian sorkar department hrang hrang, bank leh mobile operator eng emaw zatin dawr an hawng a, cashless digital transaction inhrilhfiahna leh inzirtirna hun buatsaih a ni bawk.