Assam-a Manipur pawl hrang hrangten Naga-te chet dan an dem

Assam-a cheng Manipur pawl hrang hrangte chuan Naga-te'n National Highway an dan mek an titawp mai lo a nih chuan buaina nasa zawk a chhuah an hlauh thu sawiin, Naga-te chet dan chu an dem tak zet tih an sawi.

Cahar district-a World Manipuri Organisation-te chuan thuchhuah siamin, NH dan chu tihtawp vat a nih loh chuan boruak ṭha lo zawk a hring chhuak mai thei niin an sawi. NH danchah chu dankalh a nih thu sawiin, Naga-te chet dan chu uchuak an tih thu an sawi a, titawp thuai turin an phut. Hetih lai hian truck ruak 811 zet chuan Nilaini khan Manipur khawpui Imphal an chhuahsan a, Assam-ah oil an phur dawn a ni. Tunkar tir lam khan truck 500 vel zet chuan Manipur-ah hian oil an phur lut nia tarlan a ni a, hei hian mamawh zualpui a phuhruk theih beisei a ni.

NH dan chah a nih chungchangah hian sorkar laipui, Manipur sorkar leh United Naga Council-te chuan remna zawnga inbiakna an la nei lo nia tarlan a ni. UNC-te chuan police-te'n an hren mek an President Gaidon Kamei leh Publicity Secretary Stephen Lamkang-te chu chhuah turin an la nawr reng a, an thil phut hi sorkarin a tihhlawhtlin sak a nih chuan UNC-te chuan NH dan tawpsan an tum nia sawi a ni a, mahse an thil phut hi state sorkar chuan tun thlengin a la tihhlawhtlin sak lo thung.

Hetih lai hian remna zawnga inbiakna nei turin inbuatsaihna a kal mek nia tarlan a ni a, Imphal-ah emaw Delhi-ah emaw inbiakna hi neih tura ruahman a ni. Manipur sorkar chuan tualchhung buaina chingfel tur hian sorkar laipuiah para­military force caompany 60 tir lut turin a phut a, company 29 tirh luh an ni tawh. UNC-te hian nikum November 1 aṭang khan, state sorkarin Sadar Hills leh Jiribam-te district-a hlankai a tum duhlohna lantirin, Imphal-Dimapur (NH 2) leh Imphal-Jiribam (NH 37)-te hi an dang chat ṭan a, tun thlengin an la kalpui a ni. Hei vang hian Manipur mipuite chuan nitin mamawh lakkhawm kawngah harsatna nasa tak an tawk mek a ni.