Manipur tualchhung buainaah Congress party mawhphurtu an ni : Rijiju

Union Minister of State for Home Kiren Rijiju chuan, Manipur-a tualchhung buaina thlen mek chhanah leh, dan leh thupek kenkawh mumal theih a nih loh chhanah, state-a rorel lai Congress party chu mawhphurtu an nih thu, Nilaini khan a sawi.

Union minister Rijiju chuan, Assam-a BJP kaihhruai sorkar chuan dan leh thupek a kengkawh ṭha niin a sawi a, Manipur-a Congress sorkar erawh dan leh thupek kenkawh kawngah a hlawhchham a ni, a ti. Kar hnih liamta khan Manipur a tlawh tih sawiin, Chief Minister Okram Ibobi Singh nen inkawmna hun ṭha tak an neih thu a sawi. "Kan inkawmna hian chief minister Okram Ibobi Singh chu dan leh thupek khauh zawka kenkawh a nih theih nan leh, tualchhung buaina tihreh a nih theih nan sorkar laipuiah ṭanpuina dil turin ka hrilh a, mahse Congress sorkar chuan thurawn a ngaipawimawh duh lo a ni" a ti.

Rijiju chuan, United Naga Council (UNC)-te'n hun rei tak chhung Imphal-Dimapur (NH 2) leh Imphal-Jiribam (NH 37) kawngpui an dan chah avanga mipuite chunga tawrhna thleng mek chu ṭha a tih loh thu sawiin, state sorkar chu chak zawka hma la turin a phut tih a sawi. Tun thlenga NH dan chah a la ni chu a dem tak zet tih sawiin, mipuite tawrhna sukiang tura inremna zawnga inbiakna neih a nih theih nan hma la turin state sorkar chu a phut bawk.