Assam CM-in UCC hman a thlawp

Assam chief minister Himanta Biswa Sarma chuan Uniform Civil Code (UCC) hman a thlawp tih sawiin, Muslim hmeichhiate humhalhna tur atana hman a ṭul thu a sawi.

"UCC hi hman a nih loh chuan, mipaten nupui pakhat aia tam an neih theihna chu hman chhunzawm a ni zel dawn a, nupui 3/4 te neiin hmeichhiate dikna an hliahkhuh sak zel dawn a ni," tiin Muslim hmeichhiate a kawmte chuan UCC hman hi an duh vek niin a sawi. Muslim hmeichhiate dikna chanvo humhalhna turin, triple talaq hnawl hnuah UCC chu hman a ngai a ni, a ti.

Pathianni khan New Delhi-ah Sarma hian Uttarakhand chief minsiter Pushkar Singh Dhami a hmu bawk. Uttarakhand CM hian an state-a BJP sorkar chuan UCC hmanna tur ruahmanna an siam dawn tih a lo sawi tawh a ni.

Hetih lai hian All India Muslim Personal Board (AIMPLB) chuan state ṭhenkhat chief minister-ten UCC hman an rawt chu sawiselin, he dan hi ram danpui kalh leh minority-te rahbehna tur niin an sawi.

UCC hi ram mipuite chunga ang khat veka dan hmanna, sakhua, gender leh hnam thliar lo a, inneih, inṭhen, nau lak, thil inrochun chungchanga dan pakhat vek hmanna tur a ni.