President-in Assam a tlawh dawn

President Ram Nath Kovind chuan Bodo Sahitya Sabha (BSS) conference hmanpui turin naktuk hian Assam a tlawh dawn.

Ni thum awh tur, BSS 61st annual conference hi nimin aṭang khan neih ṭan a ni. Bodoland Territorial Region-a Tamulpur-a conference neiha telh duh, sorkar hnathawkte chu Assam sorkar chuan special leave a pe a ni.

BSS president Toren Boro chuan hmarchhak biala literary event buatsaih tawhah President of India hi an la tel ngai lo a, tun ṭuma President Kovind-a'n a telpui tur chu an tan thil chhinchhiah tlak a nih thu a sawi.

Conference-a tel tur hian hmun hrang hrang aṭangin mi 4,000 chuan an kal a, a tam zawk hi Bangladesh, Nepal, Tripura, Nagaland leh West Bengal-a Bodo ṭawng hmangte an ni.

Assam sorkar kum 1 tlin lawmna Amit Shah-a'n hmanpui dawn
Assam-a chief minister Himanta Biswa Sarma kaihhruai sorkar chuan May 10 hian kum khat a tling dawn a, hemi puala lawmna buatsaih chu union home minister Amit Shah-a'n a hmanpui dawn.

Amit Shah hian ni hnih cham turin May 9-ah Assam hi a thleng dawn a, project hrang hrang a hawng ang. Gauhati Medical College Hospital (GMCH) hnuaia khum 300 awmna, super-speciality hosptial pawh a hawng dawn a ni.

Assam CM chuan May 10 aṭangin amah telin minister-te chuan district hrang hrang tlawhin, hmasawnna hna thawh hrang hrangte an enpui dawn a ni, a ti. School, hospital, stadium leh university-te an tlawh kual dawn bawk tih a sawi. June 10 thleng district-te hi an tlawh kual dawn tih a sawi.

Sarma chuan a kaihhruai BJP sorkar chuan Assam mipuite rawngbawl hna theihtawpin an thawk zel dawn tih a sawi a, an state hmasawnna tura ruahmanna an neih hrang hrangte a sawi bawk.