Tripura : Congress hruaitu beitu nia puh mi 3 man

Tripura police-te chuan Congress senior leader leh minister hlui, Sudip Roy Barman beih tumtu nia puh mi pathum an man.

Pathianni khan Agartala-ah Congress hruaitu Barman hi advocate Somik Deb ina a awm laiin misualten beih an tum a, mahse Barman PSO chuan misualte rawn kal veleh hian an pahnih hian inchhungah a kalh hnan avangin an khawih thei ta lo a ni. Barman-a PSO leh a driver erawh kut an thlak a, hliam na tak an tuar a ni.

Tripura chief minister Biplab Kumar Deb chuan he thil thleng hi a dem thu sawiin Tripura DGP chuan misualte chu zawng chhuak tur leh, hremna na tak pe turin a lo hrilh tawh a ni. Chief Minister Office chuan CM Deb chuan dan kalh leh pawikhawihna thlen zawnga chetna chu eng kawng mahin a ngaizam dawn lo tih a sawi.

Thawhṭanni khan police-te chuan mi pathum - Abdul Sahin, Subhashish Lahiri leh Bappa Nandi te an man a, thu zawhfiah mek niin he pawikhawihnaa inhnamhnawih mi dangte pawh hriatchhuah thuai an tum tih additional SP West Trpiura (rural) Anirban Das chuan a sawi. An mi man pathumte hi court-ah kalpui nghalin, May 15 thleng Judicial custody-a awm turin court chuan a lo relsak.

Tripura BJP president Dr Manik Sabha chuan Congress hruaitu beih tum a nih leh, a PSO leh driver-te khawih hliam an ni chu a dem thu a sawi a, BJP chuan hetiang pawikhawihna thlen hi a duh ngai lo tih a sawi. Pawikhawihna thlenga inhnamhnawihte chu hremna na tak pek an phut thu a sawi a ni.

Eptu hruaitu, chief minister hlui Manik Sarkar pawhin he thil thleng hi chhui chian an phut thu sawiin, an state-a dan leh thupek kenkawh ṭhat tawk loh zia a tilang a ni, a ti.

Congress party chuan West Agartala Police Station-ah FIR an thehlut tawh bawk.