Nagaland SIT-in Mon-a inkahna thleng chungchang final report thehlut

Nagaland sorkarin nikum December 4-a Mon district-a sipaiten civil mi an kahhlum chungchang chhui tura a din, Special Investigation Team (SIT) chuan local court-ah final report a thehlut tawh tih a sawi.

Sorkar-a senior official chuan report hi thla hmasa khan District and Sessions Court,Mon-ah an thehlut tih an sawi a ni. Report hi public prosecutor kutah a awm mek a, ṭhenkhat belh tur a la awm a, hengte hi tihfel a nih hunah court-ah an thehlut ṭha leh dawn tih a sawi a ni. Report-a an tarlante erawh an puangzar duh lo.

Official dang pawhin report-te hi prosecutor-te chuan an enfiah mek tih a sawi a, hei hi state tam zawkah pawh tihdan phung a nih thu a sawi bawk.

SIT hian Jorhat, Assam pawh tlawh tawhin, nikum December 4-a Mon district-a beihpui thlaknaa tel sipai mi leh sate pawh thu an zawt a ni. Hei bakah hian civil mite kahna hmun pawh hi ṭum eng emaw zat an tlawh a, helai hmuna thil ṭhenkhat chu state pawn lama forensic laboratory-a enfiah turin an thawn a, thlalak leh video darhte pawh tehnical institute lamin an enfiah bawk.

Mon district-a sipaiten civil mite an kah tukah state sorkar chuan thil thlen dan chhui chiang turin SIT hi a din nghal a, thla khat chhunga report thehlut turin a ti a ni. Mahse hun pek chhunga chhui hna hi an zawh hman loh avangin hun pek belh an ni. Army pawhin thil thleng hi an chhui chiang ve bawk.