Min man kha a hma aṭanga PMO-in a ruahman lawk a ni : Jignesh Mevani

Prime minister Narendra Modi sawichhiatna lam hawi ziaka puha Assam police-ten an man, Gujarat MLA Jignesh Mevani chuan man a nih dan chu a hma aṭanga Prime Minister Office-in a lo ruahman lawk vek niin a sawi. Hei hi an state-in assembly inthlan an neih tura amah tihchhiat an tumna a ni, a ti.

Jignesh Mevani hi independent MLA niin, Congress party a thlawp a ni.

Mevani hi Gujarat-a man a nih hnuah Guwahati-ah hruai a ni a, Thawhṭanni khan bail-a chhuah a nih hnuah press conference neiin, Assam police-ten an man chu amah tihchhiat tuma a hma aṭanga PMO in a lo ruahman lawk niin a sawi. Gujarat assembly inthlan neih a nih dawn hnai tawh a, hei vang hian politics lama a dinhmunte tihchhiatsak tumin an beihna a ni tiin, a computer an man sakah pawh eng emaw tak amah puh letna tur thil an dah maitheih thu a sawi bawk.