Assam cabinet-in paper mill-a thawkte chhawmdawlna tur Rs vbc 308.75 pek chhuah a remti

Assam cabinet chuan an state-a paper mill pahniha thawkte chhawmdawlna tura cheng vaibelchhe 700 a lo pawm tawh aṭangin, cheng vaibelchhe 308.75 pekchhuah a remti.

Thawhlehnia cabinet meeting zawhah chief minister Himanta Biswa Sarma chuan state sorkarin paper mill-a hnathawktute a chhawmdawl chhunzawm zel tur thu hi a sawi a ni. Nikum khan state sorkar chuan paper mill pahniha hnathawkte hlawh tang pekna tur leh mamawh dang atan Rs vbc 700 pek a lo remti tawh bawk a, September thla khan cabinet chuan a pawm a, mahse thawktute hlawh hi tun thlengin tihfel sak an la ni lo.

Hindustan Paper Corporation Limited (HPCL)-in Nagaon leh Cachar-a paper mill pahnih a siamte hi hun rei tak hna thawk loa khar a nih hnuah, Assam sorkar chuan Rs vbc 375-in March 28 khan a lachhawng a ni. Minister Pijush Hazarika chuan paper mill pahniha thawkte hlawh la tang pawh thla thum chhunga chinfel vek a nih tur thu a sawi tawh a ni.

Nagaon leh Cachar paper mill-a Joint Action Committee of Recognised Unions (JACRU) chuan Thawhṭanni khan Chief Minister chu email thawnin, chhawmdawlna chu a rang thei anga pe chhuak turin an ngen.

Panchgram-a Cachar Paper Mill hi kum 2015, October thla aṭangin khar a ni tawh a, Jagiroad-a Nagaon Paper Mill hi kum 2017, March thla aṭangin khar a ni tawh bawk. Mill pahniha thawkte hi thla 63 chhung hlawh pek an ni tawh lo a, hemi chhung hian thawktu zinga 103 an thi hman a ni. A tam zawk chu hlawh an lak theih loh avanga an dam lo, inenkawlna tur nei loa thi an ni.

Health minister Keshab Mahanta chuan cabinet-in Rs vbc 308.75 pek chhuahna tur a pawm tak vangin, paper mill pahniha thawkte chuan an hlawh tang bakah arrear pawh reiloteah an dawng vek thei dawn tih a sawi. State sorkarin paper mill a tuaitharnaah, mill pahniha lo thawk tawh mi 100 chu kar khat chhungin, hnathawkah a la chhunzawm leh dawn tih a sawi bawk.