Meghalaya Games 2022 nei ṭan

4th Meghalaya Games 2022 chu state chief minister Conrad K Sangma chuan Thawhlehni khan Shillong-a SSA Stadium-ah a hawng.

Games patron ni bawk, Chief Minister chuan Games buatsaihtu, Meghalaya State Olympic Association (MSOA) leh Sports and Youth Affairs department-te chu a lawmpui thu a sawi. Kum tin neih chhoh a nih tawh tur thu leh, nakkumah Games hi Tura-ah nghatin, kum 2024-ah Jowai-ah neih a ni dawn tih a puang nghal bawk.

Meghalaya Games hi kum 2001 khan nei ṭanin tun ṭum hi vawi li an neihna tur chauh a ni. Tun ṭumah hian infiammi 2,500 telin, discipline 19-ah intihsiakna hi neih a ni ang.

CM chuan Meghalaya Games hi mumal lo taka kalpui a nih hnuah, kum 2020 aṭang khan state sorkar chuan a tharthawh leh tih a sawi. State chhungah ṭhalai an pung zel a, tunah hian kum 25 hnuai lam mi nuai 22 vel an awm thu sawiin, hei vang hian sorkar pawhin ṭhalai, infiam ngaina tak takten an ngainat leh tui zawng infiamna lamah an talent neihte an pholan theihna hun remchang siamsak a duh tih a sawi.