Manipur sorkarin Shirui Lily festival poster a tichhuak lo tih a sawi

Manipur sorkar chuan social media lama state level Shirlui Lily Festival 2022 poster thehdarh chu sorkar tihchhuah a nih loh thu a sawi.

Shirui Lily Festival vawi 4-na tur puala poster siamah hian state tourism department logo dahin, a hmaa Hindu pathian Krishna leh a sir lamah Shirui Lily par lem leh Manipur mi, Tangkhul hnam mi nia lang thlalak dah a ni. He poster hian mipuite lung a ti awi lo hle a, sorkar pawh an chhal nasa hle a ni.

Poster chungchanga sawiselna nasa tak a awm hnuah, Thawhlehni khan state sorkar chu insawifiahin, Tourism department director W Ibohal Singh chuan he poster hi a lem a nih thu leh, an department siam a nih loh thu a sawi. "Department lam chuan logo leh thlalak chuanna poster engmah a la tichhuak lo," a ti. Mipuite chu he poster lem hi social media lamah thehdarh chhunzawm tawh lo turin a ngen bawk.

Tourism Director chuan poster lem thehdarh chungchangah a siamtu leh mawhphurtute laka a ṭul angin action lak a ni dawn tih a sawi a ni.

Sihrui Lily Festival hi Ukhrul headquarters-ah May 25-28 chhung hian neih a ni ang. He festival hi state flower, Shirui Lily, Kashongwon tih bawk puala kum tina sorkarin a buatsaih ṭhin a ni a, ram chhung leh ram pawn aṭangin festival chhimtu khualzin eng emaw zat an kal ṭhin.