Union Minister-in hmarchhaka infrastructure tihchangtlun a ṭul thu sawi

Union minister G Kishan Reddy chuan hmarchhak biala infrastructure tihchangtlun a pawimawh thu sawiin, agriculture, employment generation leh skill development-te chu ngaih pawimawh a ngai a, hemi atan hian hmarchhak biala officer-te chuan ruahmanna fel tak hnuaia an thawhho a ṭul a ni, a ti.

Nilainia Guwahati-a central leh hmarchhak state pariat-a senior official-te nena inkawm hona an neihah Minister Reddy chuan he thu hi sawiin, officer hrang hrangte chu hmarchhak bial hmasawnna tura thawk tur leh, fund-te pawh a nihna dik taka hmang turin a chah.

Development of North East Region (DoNER) minister chuan, "Infrastructure lam hmasawnna ngaihtuah chungin, state sorkar leh central ministry-te chuan khawtlang hmasawnna leh hna tam zawk siamna tur chu ang khat renga an ngaihpawimawh a ṭul a ni," a ti. DoNER chuan hmasawnna tura hmalaknaa coordinator angin theihtawp a chhuah zel dawn tih sawiin, central leh state sorkar hnuaia ministry hrang hrangte pawh review meeting la neihpui a tum tih a sawi bawk.

Agri-task force siam thar chungchangah state sorkar tinte thawhpui tura sawmin, Minister chuan hei hian fund hmanna kawngah puiin, hmarchhak biala mipuiten an chhawr ṭangkai dawn a ni, a ti.