Manipur : Truck leh oil tanker lambunnah mi pakhat thi, midang pathum hliam

Manipur khawpui Imphal pana tlan truck leh oil tanker eng emaw zat chu Ningani khan lambun an ni a, mi pakhat a thih bakah midang pathumin hliam an tuar.

Truck leh tanker-te hi National Highway 37-ah lambun an ni a, hliam tuarte hi hospital thlenpui an nih hnuah an dinhmun a ṭhat loh avangin Imphal panpui leh an ni. Ningani khan truck leh oil tanker 500 vel zet chuan Jiribam aṭangin Imphal hi an pan a, kawng lakah lambun an ni ta tih central paramilitary force-te chuan an sawi. Inlambunna hmunah hian inkahna a chhuak zui a, pawikhawihtute hi hriat an la nih loh bakah, eng hel pawl mahin an tih a nih thu an la chhal lo. He thil thlen hnu hian lirtheite chu kawngpui dungah din tir an ni a, venhimna khauh zawk hnuaiah Imphal panpui leh an ni ang.

He thil thleng hi Union Minister of State for Home Kiren Rijiju chuan a dem thu a sawi a, United Naga Council (UNC)-te'n tiam chin awm loa National Highway an danchah titawp thei loah Manipur sorkar a puh. Hetih lai hian Chief Minister Okram Ibobi Singh chuan tualchhung buaina chingfel tur hian sorkar laipui chu inremna zawnga 'tripartite talk' buatsaih thuai turin a ngen. Manipur sorkar leh United Naga Council (UNC)-te inkar chingfel theitu chu sorkar laipui a nih thu sawiin, remna zawnga inbiakna neih a nih thuai theih nana chak zawka hma la turin a phut tih a sawi.

United Naga Council (UNC)-te hian November 1 aṭang khan NH an dang a, ni 70 chuang an kalpui tawh. UNC-te hian tunhma lama 'economic blockade' lo neih tawh ṭhin te rei zawng a huam tawh a, an la tawpsan mai rih dawn lo nia a lan avangin mipuite an mangang tawh hle a ni. Kum 2010 khan ni 68 chhung 'economic blockade' hi neih a lo ni tawh a, a kum leh 2011 khan ni 121 chhung neih a lo ni tawh bawk. NH dan chah a nih avang hian mipuiten oil leh gas bakah damdawi lamah te harsatna nasa tak an tawk a, thil man a sang chak hle bawk.

'Economic blockade' hian Kuki leh Naga-te chenna bialah te nghawng a nei nasa zual a, nitin mamawh lakkhawm mumal theih a ni lo. Hetih lai hian UNC-te chuan Election Commission of India (ECI)-in Manipur assembly election neih hun tur puang tawh mah se, an thil phut a hlawhtlin hma loh chuan kawngpui dan an kalpui mek chu tawpsan an tum lo tih an sawi. CM Ibobi Singh chuan, UNC-te chu inbiakna neihpui turin state sorkar a inpeih reng tih a sawi a, NH dan chah titawp tawh turin a lo ngen tawh bawk.

Hetih lai hian Naga helpawl National Socialist Council of Nagaland - Isak-Muivah (NSCN-IM) chuan sorkar laipui chu Naga mipuite hmakhua ngai lo leh, an harsatna ngaihtuah tawk lohah an puh. NSCN(IM) hruaitu R N Ravi chuan Manipur-a All Manipur United Club Organisation (AMUCO), Committee of Civil Societies of Kangleipak (CCSK), United Committee Manipur (UCM)-te chu Delhi-ah kal a 'economic blockade' chungchang sawipuiah an sawm a ni.

Goodwill Mission for Peaceful Co-existence (GMPC) pawhin Naga, Kuki, Muslim, Meitei leh hnam dangte chu remna leh muanna a awm thuai theih nana sorkar laipuiah ngenna thlen turin an ngen ve bawk. Tualchhung buaina chinfel kawngah sorkar laipui chu hma la chak tawk loh nii, Good Will mission chuan an puh a ni. Union Mos Home Kiren Rijiju chuan nuikum December 23 khan Manipur a lo tlawh tawh a, harsatna thleng mek chungchang a hmunah kalin a enfiah a ni. Kiren Rijiju chuan Manipur tualchhung buaina chuangchangah hian Congress kaihhruai state sorkar chu mawhphurtuah puhin, buina chinfel kawnga hma la ṭha tawk loah a lo puh ve tawh bawk.

Manipur cabinet Meeting chuan kum 2016 khan, Jiribam leh Sadar Hills-te chu district-ah hlankai a remti a, hei hi Naga-te chuan duh loin, hmasang ata tawh Naga-te chenna leh an ram niin an chhal a ni. November 2016 aṭang khan United Naga Council (UNC)-te chuan state sorkar chu a thuthlukna lo siam tawh sut leh tura phutin, inkalpawhna kawngpui pawimawh pahnih National Highway 2 leh 37-te chu an dang chat a ni.