Meghalaya-ah Northeast Food Show lian ber buatsaih

Hmarchhak biala food show lian ber chu Ningani aṭang khan Meghalaya khawpui, Shillong-a Polo Ground-ah buatsaih a ni. He food show hawnnaah hian Meghalaya chief minister Conrad K Sangma leh Sikkim chief minister Prem Singh Tamang-te chu khuallian an ni.

Food show hi ni thum awh tur a ni. CM Sangma chuan Northeast Food Show chu state chhung leh hmarchhak state danga loneitute leh sumdawngten an thil tharchhuah leh siamchhuahte an pho chhuah a, international market lama an tana kawng hawn sak theitu a nih thu a sawi. He show hian stakeholder hrang hrangte ko khawmin, agri-horti product hlutna pawh a tipung sawt a ni, a ti.

Meghalaya hian khawvela No.1 Food Innovation Network, SIAL nena thawkdunin kum 2019 khan mega food exhibition show hi a ṭum khatna atan a lo buatsaih tawh a ni. Tun ṭum hi vawi hnih an buatsaihna niin, hmarchhak bial chhung hmun hrang hrang aṭangin an tel a ni.

CM Sangma chuan Meghalaya chuan Northeast Food Show hi kum dangah pawh a buatsaih chhunzawm zel dawn tih sawiin, kumtinin pui zawka tihchhoh zel an tum tih a sawi. Kumin Food Show buatsaih hmanpuitu, Vietnam ambassador Pham Sanh Chau chungah lawmthu sawiin, food processing sector-ah khawvel huapin Vietnam ram chu entawn tur ṭha tak niin a sawi a, an tihdan entawnin hmarchhak bialte chuan thawhhona ṭha tak neia global platform an nih theih a beisei thu a sawi bawk.