Meghalaya-ah bawngsa indaih lohna thleng mek

Assam sorkarin bawng humhalhna dan, Assam Cattle Preservation (Amendment) Act, 2021 a hman hnuah a ṭhenawm, Meghalaya state chuan bawngsa indaih lohna an tawk.

Bawng humhalhna dan hman a nih hnuah Assam aṭang leh, Assam kaltlanga bawng lakluhte tihtawp a nih tak vangin Meghalaya hian an tuar mek a, Khanapara-a bawng zawrhna hmunte pawh khar a ni tawh.

State chhunga bawngsa zuartute chuan harsatna tawkin, bawng talh turte hi black market-ah man to zawka an lei a ngai ṭhin.

Khasi Jaintia Butchers' Association general secretary, Generous Warlarpih chuan Assam sorkarin Meghalaya-a bawng lakluh tur chu a dan sak tawh a, hetih lian hian Meghalaya sorkar chuan an harsatna sutkian sakna turin eng thil mah a ti lo tih a sawi. Sorkarin tualchhunga bawngsa zuarte hnenah challan a pe nia a sawi pawh thu dik lo a ni, a ti.

Assam-in bawng humhalhna dan a siam chu an zahsak tih sawiin, Association chuan Assam aṭanga bawng lakluh theih a nih tawh loh chuan state sorkar chuan kawng dang a ngaihtuah sak a ngai tih an sawi. West Bengal aṭanga bawng lakte chu Assam kaltlanga lakluh phalsak tura hma la turin an phut.