Tripura CM-in Agar export-a quota siam tihbo duh

Tripura chief minister Biplab Kumar Deb chuan union minister for development for North East Region (DoNER) G Kishan Reddy hnenah Agar export-a quota method hman mek chu tihbo a duh thu a thlen.

Quota method system hman mek ai hian sorkar laipui chu Agarwood puala national board din zawk tura ngenin, hei hian Agar chin kawngah pawh nasa zawkin hma a lak theih dawn a ni, a ti.

CM Deb chuan, "Agarwood chungchanga sumdawnna a hriat hnuah, prime minister Narendra Modi chuan Tripura tan quota, metric ton 25,000 a pe a ni. Mahse DoNER minister hnenah hian hetianga bithliah siamna hi titawp a, state hrang hrangte chu Agarwood tam zawk tharchhuak tura thuam chak zawk turin ka ngen a ni," tiin a sawi.

Tripura hi Agarwood cultivation hi tun hnaia nasa zawka kalpuiin, Agartala-ah pawh buyer-seller meeting a lo buatsaih tawh bawk. Deb chuan Tripura bakah hmarchhak state dang boruak leh leilungte chu Agarwood chinna tan ṭha a nih thu a sawi bawk.