Gadkari-a'n AP-a highway project kalpui tur a hawng

Union Minister for Road Transport and Highways, Nitin Gadkari chuan Inrinni khan Arunachal Pradesh-a highway project kalpui tur pali a hawng.

Arunachal-a highway project kalpui nan hian cheng vaibelchhe 935 ruahman a ni a, four-lane highway pakhat leh two-lane highway pathum siam a ni ang. State khawpui Itanagar leh Holongi inkar chu four-lane-a siam a ni dawn a, NH-52A niin, km 20-a thui siam a ni ang. Hemi atan hian cheng vaibelchhe 476 ruahman a ni a, Assam khawpui Guwahati nena awlsam zawka inkalpawhna tura duan a ni. Two-lane siamna atan hian cheng vaibelchhe 460 ruahman a ni bawk a, project hi Special Accelerated Road Development Programme for North East (SARDP-NE) hnuaiah kalpui a ni ang.

Union minister Nitin Gadkari chuan, Arunachal-a inkalpawhna kawngpui siamna atan sorkar laipui chuan kum nga chhungin cheng vaibelchhe 50, 000 a ruahman sak dawn niin a sawi a, project thar eng emaw zat duan a ni ang, a ti. Chung zingah chuan Itanagar - Banderdewa te, Itanagar - Naharlagun-te pawh telh a ni ang a ti a, kumin October aṭanga hna ṭan tum a nih thu a sawi. State chhungah two-lane highway a tam thei ang ber siam tum a nih thu sawiin, hemi atan hian cheng 20800 vel ruahman a ni a, National Highway awmsa km 2,223 pawh a theih anga chei ṭhat a nih tur thu a sawi.

Gadkari chuan, project-te hi National Highways and Infrastructure Development Corporation Limited (NHIDCL)-te chuan an thawk dawn a, kumin chhungin a tam thei ang ber thawh a ni ang, a ti. NHIDCL office chu dan leh thupek mumal zawka kenkawh an nih theih nan leh, harsatna awm ṭhenkhatte pumpelh a nih theih nan, Assam-a Tezpur aṭangin Arunachal-ah sawn a nih tur thu a sawi bawk.

Arunachal Chief Minister Pema Khandu chuan, Prime Minister Narendra Modi leh Road Transport and Highways minister Gadkari-te hmalakna chu fakawm a tih thu a sawi a, inkalpawhna tihchangtlun nana sum tam tak ruahman a ni chu ropui a tih thu a sawi. Pradhan Mantri Gram Sadak Yojana (PMGSY) hnuaia state chhung hmun hrang hranga thingtlang khua te kalpawhna tura kawngpui sial chu an ṭangkaipui thu a sawi.

Project hawnna inkhawm hi state Chief Minister Pema Khandu, Union Home Affairs Minister Kiren Rijiju, Speaker TN Thongdok, Deputy Chief Minister Chowna Mein, Home Minister Kumar Waii, UD Minister Nabam Rebia, Health Minister Jomde Kena, Industries Minister Tamiyo Taga, State BJP President Tapir Gao bakah, Parliamentary Secretary eng emaw zatin an hmanpui a ni.