Arunachal CM-in Minister thar pathum neih belh

Arunachal Pradesh Chief Minister Pema Khandu chuan minister thar pathum a neih belh leh ta a, kar kalta Inrinni khan minister thar-te hi lakluh an ni.

Minister atan hian Alo Libang, Bamang Felix leh Mahesh Chai-te chu lakluh an ni. Alo Libang hi Tuting-Yingkiong bialtu MLA a ni a, Felix hi Nyapin bialtu MLA ni lai niin, Mahesh Chai pawh Tezu bialtu MLA ni lai a ni. Heng MLA-te hi Itanagar-a Raj Bhavan Darbar Hall-ah Governor V. Shanmuganathan chuan rinawmna thu tiam tirin minis­ter atan hian a la lut a ni.

Lakluh inkhawmah hian CM Pema Khandu, Union Minister for Road, Transport & Highways, Nitin Gadkari, Union Minister of State (Home) Kiren Rijiju, State Legis­lative Assembly Spea­ker T.N. Thongdok bakah, Cabinet Minister, Parlia­mentary Secretary leh MLA ṭhahnem tak an tel.

CM Khandu leh MLA 33-te chuan Peoples Party of Arunachal (PPA) chhuahsan a, BJP an zawm avangin, kum 2016 December 31 khan Arunachal-ah hian BJP sorkar a ding a ni. BJP sorkar a din hnu hian minister ṭhenkhat leh an hna chanpual siksawi a awm nual a, minister thar atana lakluh an awm nual bawk. Tun dinhmunah rorellai BJP chuan, Assembly seat 60 aṭangin MLA 45 a nei mek a ni.