Nagaland ULB Poll : Candidate 37 inhnukdawk

Nagaland-a Muni­cipal/ Town Council elec­tion neih turah candi­date 37-te chuan kar kalta Ningani khan an inhnuhdawh thu an puang.

Kar kalta Nilaini khan Nagaland State Election Commission chuan February 1-a Urban Local Body (ULB) election neih tur atana candidate mi 535-te hming a puang a, mahse candidate 37-te chuan an inhnuhdawh thu hi an puang zui a ni. Tribal pawl hrang hrangte chuan eletion neih tur hi boycott an tum thu an lo sawi tawh a, candidate-te pawh inhnukdawk turin an ngen bawk.

Candidate inhnuk­dawk zingah hian Pfut­sero Town Council-a candidate 27 an tel a, Phek Town Council aṭangin Independent candidate pahnih leh, Congress candidate pahnih an awm. Dimapur Municipal Council leh Tobu Town Council aṭangin BJP can­didate pakhat ve ve an inhnukdawk a, Meluri Town Council aṭangin independent candidate pahnih an tel bawk. Heng bakah hian Kiphire Town Council leh Chozu­ba Town Council aṭang pawhin candidate inhnuk­dawk an awm nual a ni.

Nagaland Pradesh Congress Committee (NPCC) chuan emergency meeeting an neih hnuah, ULB election neih hun sawn hla turin state sorkar an phut tih an sawi.

Hetih lai hian Joint Action Committee on Women Reservation (JACWR) chuan Supreme Court-a Special Leave Petition (SLP) an lo thehluh tawh chu hnuhkir an remti nia tarlan a ni.

JACWR-te chuan Inrinni khan thuchhuah an siam a, Nagaland sorkarin Urban Local Body (ULB) election neih tura hmeichhe tana seat 33% a hauhsak chu ṭha an tih lo thu an sawi nawn leh. Hetih lai hian India danpui Article 371 A tlawhchhana, Supreme Court-a petition an lo thehluh tawh chu hnuhkir leh an remtih tih an sawi. An inremna kimchang erawh tarlan a ni lo. JACWR aiawhte leh state sorkar aiawhte chuan tun hnai khan emergency meeting an nei a, petition hnukkir leh tur hian inremna an siam a ni. State Assembly chuan Article 243 T behchhanin ULB election atan hian seat 33% hauhsak a remti a, hei hi pawl ṭhenkhat chuan an dodal a, nawrh vawi eng emaw zat an lo huaihawt tawh bawk.