Manipur-a inlambunna thleng chhuichian a ni ang : Rajnath Singh

Home Minister Rajnath Singh chuan, kar kalta Ningani-a National High­way 37-a inlambunna thleng chu chhuichian a nih tur thu Inrinni khan a sawi.

Kar kalta Ningani khan Jiribam aṭanga Manipur khawpui Imphal pana tlan truck leh oil tanker eng emaw zat chu kawng lakah lambun an ni a, mi pakhat a thih bakah midang pathum ten hliam na tak an tuar a ni. Hliam zinga pahnihte hi ICU-ah dahluh an ni a, an dinhmun a ṭhal o hle nia tarlan a ni. He thil hi United Naga Council-te'n nikum November 1

aṭanga National Highway an danchah hnua inlam­bunna a thlen vawi khatna a ni tawh lo a, lirthei hal leh suasam te pawh a lo thleng fo tawh a ni.

Inlambunna thlenga hliam tuar pakhat chuan, “Tribal mi pariat vel te chu NH 37 kawngpui chhak lam tlang aṭanga lo chhukin, silai an hmetpuak zui ta mai a ni. An ṭawng hman aṭangin tribal an ni tih a hriat a, an zinga ṭhenkhat chuan min rawn beiin, inkahna a thleng zui ta a ni" a ti. He thil thleng hi police-te chuan an chhui zui nghal a, man an la neih loh bakah, hel pawl eng mahin an tih a nih thu an la chhal lo. Truck leh oil tanker bakah mimal lirtheite chu CRPF-te vemnhimna hnuaiah Imphal panpui an ni.

Manipur sorkar chuan tualchhung buaina chingfel turin sorkar laipuiah central paramilitary force company 60 tir lut turin a lo ngen tawh a, com­pany 29 tirh luh an ni tawh. Chief Minister Okram Ibobi Singh chuan NH 2 leh 37-te chu an chakkhai lamna kawngpui pawimawh a nih avangin kawngpui dan hi mipuiten an tuar nasa hle tih a sawi a, sorkar laipui chu buaina chinfel kawnga hma la chak tawk loah a puh.

Manipur-ah hian tunhnaia inlambunna thleng duhlohna lantirin, kar kalta Zirtawpni khan dawr, sorkar office, zirna-in leh sumdawnna hmunte khar a ni.