Nagaland-ah total lockdown An puang maithei
Nagaland sorkar chuan an state-ah Covid-19 kai an pun belh zel avangin total lockdown puan a ngaih leh ngaih loh chungchang ngaihtuah turin health and family welfare department chu a hrilh a ni.
Nilaini khan hri kai hmuh belh mi 13 leh nimin zingah mi pathum an awm leh a, anni nen hri kai hmuh chhuah tawh hi mi 660 an awm tawh a ni. Hri kai hmuh thar zingah hian Kohima Municipal Council (KMC) a thawk pawh a tel a, hei vang hian Association of the Kohima Municipal Wards Panchayat (AKMWP) chuan state sorkar hnenah hri darh zel tur venna atan state pumah ni 14 tal total lockdown puang leh turin a ngen.
Dimapur khawpui bikah hri kai hi mi 222 an awm a, an zinga 158 chu enkawl dam an ni tawh thung. Peren district-ah hri kai hmuh tawh mi 184 awmin 76 an dam tawh a, Kohima-ah Covid-19 kai 126 zingah 59 chu dam tawhin, Mon district-ah hri kai enkawl mek 73 an la awm bawk.
High Powered Committee (HPC) for COVID-19 thupuangtu, Mmhonlumo Kikon chuan state sorkar chuan state chhung boruak chu zirchiang a, total lockdown puan a ṭul leh ṭul loh ngaihtuah turin medical department a hrilh tawh a ni, a ti.