Union minister leh army chief-te'n Manipur dinhmun thlirho

Central-a minister ṭhenkhat te leh security official-te chuan Pathianni khan Manipur dinhmun chungchang ngaihtuahin New Delhi-ah meeting an nei.

Manipur-ah hian United Naga Councul (UNC)-te chuan ni 70 chuang Nationala Highway an dangchat tawh a, hemi chung­changa hmalak dan tur ngaih­tuah hian sorkar laipuia mi pawimawhte chuan meeting an nei a ni. He hunah hian Union Home Minister Rajnath Singh, Defence Minister Manohar Parrikar, Finance Minister Arun Jaitley, Army Chief General Bipin Rawat, Home Secretary Rajiv Mehrishi leh official pawimawh eng emaw zat an tel a ni. Attorney General Mukul Rohatgi pawh meeting-ah hian a tel.

Meeting-ah hian hun rei tak chhung National Highway 2 danchah tawh hawn a nih leh thei nana hmalak dan tur te, Manipur tualchhung buaina thleng mek tihreh dan tur te an sawiho a ni. NH-2 hian Manipur, Assam leh Nagaland-te a paltlang a, inkalpawhna kawngpui pawimawh tak a ni. Hetih lai hian NH-37 chu hawn a ni tawh a, meeting chuan NH-2 pawh hawng thuai tura hmalak an rel. Manipur-ah bik hian NH-2 hi Imphal-Dimapur inkalpawhna a ni a, chakkhai lamna kawngpui pawimawh a ni a, heti chung hian lirthei tlan hmuh tur a awm lo a ni. Imphal-Jiribam inkalpawhna NH-37 erawh hawn a nih hnuah dan pangngaiin lirthei an tlan leh tawh a, hei hian mipui harsatna zual pawh a chhawk rin a ni.

NH hawn a nih thuai theih nan hian Union Home Minister Singh chuan Manipur Chief Minister O Ibobi Singh hnenah hma la tura ngenna vawi eng emaw zat a lo thawn tawh. Minister of State for Home Kiren Rijiju pawhin Manipur hi tlawhin, NH hawn leh thuai a nih theih nana chak zawka hma la turin state sorkar a lo ngen ve tawh bawk. Hun rei tak chhung NH danchah a nih chungchangah hian Congress kaihhruai state sorkar chuan dem a hlawh hle a, Rijiju ngei pawhin buaina chinfel kawnga hma la chak tawk loha a lo puh tawh a ni.

Meeting kaihruaitu Union Home Minister Rajnath Singh chuan, sorkar laipuiin a ngaih pawi­mawh ber chu NH-2 hawn thuai a ni a, hemi atan hian chak taka hmalak nghal a ni ang, a ti. Kiren Rijiju pawhin Manipur buaina chu politics lamah hamṭhat nana hmang lo turin a ngen ve bawk.

March 4 leh 8-a Manipur Assembly election neih tur chung­chang sawiho a ni bawk a, boruak muanawm tak hnuaiah inthlan neih a nih theih nana hmalak dan tur te an sawiho. Sorkar laipui chuan boruak muanawm tak hnuaiah inthlan buatsaih a nih theih nan central security force 20,000 vel zet a thawnlut tawh a ni.

Hetih lai hian Union Human Resource Development Minis­ter Prakash Javadekar chuan Manipur Chief Minister Okram Ibobi Singh chu NH hun rei tak chhung dan a nih tawh hnu pawha, titawp tura hmala chak tawk lohah puhin, bang tura a phut thu a sawi. Bharatiya Janata Party (BJP) office-a thutharthehdarhtute a kawmnaah he thu hi Javadekar chuan sawi chhuakin, Manipur CM chu tual­chhungbuaina chhuah chhan­ah mawhphurhna la ngam a, a nihna aṭanga bang ngam tura a phut thu a sawi a ni. India danpui chuan dan leh thupek kenkawh kawngah thuneihna sang tak a neih thu sawiin, sorkar laipuiin buaina chingfel tura central paramilitary force ṭhahnem tak a tirlut tawh chung pawha buaina chinfel a la ni lo leh, NH danchah reng a la ni chu pawi a tih thu a sawi.

Javadekar chuan, Manipur buaina chungchangah hian sorkar laipui chuan Manipur sorkar leh UNC-te chu inremna zawnga inbiakbna neihpui turin a sawm tih sawiin, Manipur sorkar chuan aiawh a tir lo a ni, a ti. Heng zawng zawngah hian CM Ibobi Singh chu chu mawhphurtu a ni, a ti bawk. Hetih lai hian Manipur CM chuan inbiakna nei tur hian sawmna mumal tak an dawng lo niin a sawi thung.

Manipur-ah hian hun rei tak chhung NH danchah a nih avang hian mipui nawlpuiin harsatna an tawk nasa hle a, oil, gas, damdawi leh nitin mamawh a harsa hle a ni. Gas bur pakhat man chu cheng 2,000 zela lei a ngai nia tarlan a ni a, buhfai leh thil dang man pawh a sang hle a ni. Oil lama harsatna a nasat avangin state ṭhenawm aṭangtein chawkluh a ngai hial a ni. Bungraw phur truck leh oil tanker eng emaw zat chu venhimna hnuaiah Imphal panpui ṭhin an ni a, heng te hian kawng lakah beih an tawk fo a ni.