Tribal movement ni 500 tlin pualin hun hmang

Manipur assembly-in ‘anti tribal bill’ a pass duh lohna lantir a, a do zawnga hma la tura din “tribal movement” chuan an din aṭanga ni 500-na pualin kar kalta Ningani khan hun hman a ni.

Manipur Legislative Assembly chuan August 31, 2015 khan ‘anti tribal bill’ pathum a pass a, hei hi tribal-te chuan duh loin nasa takin an dodal a, “tribal movement” hi an kalpui ta a ni. Joint Action Committee Against Anti-Tribal Bills (JAC-AATB) buatsaihin Young Paite Association General Head­quarters Hall, Hiang­tam Lamka-ah ṭawng-

­ṭai rualna hun hman a ni. He hunah hian heng bill pathumte duhlohna lantira nunna chan ta martar-te hriatrenga hun hman a ni. JAC-AATB hruaitu H. Mangchinkhup chuan, hnam tana martar-te chu an theihnghilh ngai dawn lo tih sawiin, an tha leh zung bakah an nunba hial chana hma an lo lak tawhna te chu chhunzawm zel a nih tur thu a sawi.

Assembly-in bill pathum - the Protection of Manipur People Bill, the Manipur Land Revenue and Land Reforms Bill (Seventh Amendment) leh Manipur Shops and Establishments (Second Amendment) Bill pass hi tribal-te sut leh turin state sorkar chu nasa takin an kar a ni. Tribal-te chuan heng bill pathumte hi tribal-te rahbeh tumna a ni an ti a, an duh lohna lantirnaah hian tribal mi pakuate chuan nunna an chan phah a ni.