Assam-ah Covid-19 vangin pahnih thi leh

Assam state-ah nimin khan coronavirus vanga thi mi pahnih an awm belh leh a, he hri vanga thi hi mi 24 an tling tawh a ni. 

Health minister Himanta Biswa Sarma chuan nimin khan Gauhati Medical College and Hospital-a enkawl, Covid-19 kai pahnih chu an thi tih sawiin, heng mite hi  kum 70 mi Prosnna Kumar Haloi, Guwahati mi leh, kum 56 mi, Karbi Anglong mi Ramsingh Hanse-te an nih thu a sawi.

Nilaini khan Assam-ah hri kai zinga paruk an thi a, ni khatah thi an tam ber ṭum a ni. Hemi ni vek hian hri kai thar mi 696 an awm bawk a, an zinga mi 423 chu Guwahati khawpuia mi an ni. State chhunga hri kai hmuh chhuah tawh hi mi 14,032 an tling tawh a, an  zinga 8,726 chu enkawl dam an ni tawh.  

Assam health department-in Covid-19 kaite enkawltu, doctor leh health worker-te tana quarantine rules a siam chu Indian Medical Association Assam chapter-in a sawisel hnuah a siamṭha leh. July 6 khan health department chuan doctor leh health worker-te chu a zawna ni 11 an duty hnuah rapid antigen test nei a, ni thum chhung inkhung hrang turin a ti a ni. Mahse a siam ṭhat hnuah ni 10 chhung duty tirin, ni li chhung an inkhung  hrang turin tih an ni leh ta zawk a ni.