Tripura-ah hri kai thar 57 awm
Tripura-ah coronavirus kai hmuh chhuah tawh chu mi 1,773 an tling tawh a, an zinga mi 57 te hi Nilainia hmuh tharte an ni.
Hri kai hmuh tawh zinga mi 1,324 chu enkawl dam ni tawhin, enkawl mek mi 435 an la awm. State sorkar chuan Covid-19 kai an pun belh zel avangin kar leh Thawhṭanni aṭangin state chhunga hmun 28-ah door-to-door rapid antigen test kalpui a tum. Test hi thawh hniha kalpui a ni dawn a, a thawh khatna chu July 13-ah ṭan tur niin state entry point leh containment zone 28 huam chhungah neih hmasak a ni ang. Containment zone huam chhungah hian mi 7,629 an cheng a ni.
Rapid antigen test thawh khatna atan hian test kit 50,000 vel mamawh a ni dawn a, sorkar laipui aṭangin 14,000 chu an dawng tawh tih law minister Ratan Lal Nath chuan a sawi. A thawh hnihnaah hian state chhunga in tin huam tir tum a ni a, health worker-te chu in tinah kalin screening an neihsak dawn a, khawsik leh symptom dang nei nia langte chu rapid antigen detention kit hmangin test an ni leh ang.