AP-a Covid-19 hospital khar

Arunachal Pradesh-a Naharalgun-a Covid-19 kaite enkawlna atana hman, Tomo Riba Institute of Health and Medical Sciences (TRIHMS)-ah a thawktu zinga hri kai an awm avangin Nilaini aṭang khan ni thum chhung atan khar a ni. Hei hian OPD, emergency, operation leh labour room te a huam. 

Thuneitute chuan TRIHMS-a thawktu zawng zawng screening neih an nih dawn avangin hospital hi khar a ni tih an sawi. He hospital-a thawk pakhat hian hri a kai tih hi Thawhlehni zan kha hriat a ni a, AP-a frontline worker zinga hri kai hmuh chhuah pangana a ni. 

Itanagar-a Superintendent of Police office-a thawk constable pakhat pawhin hri hi a kai a, hei vang hian office hi khar a ni bawk. Constable hri kai hmuh chhuah hi pawn lama zin chhuahna nei lo niin, ram puma lockdown puan a nih ṭantirh aṭanga office-a duty reng nia sawi a ni. 

Nilaini khan state chhungah hri kai hmuh belh mi 11 awmin, hri kai hmuh chhuah tawh hi mi 287 an awm tawh a ni. An zingah 109 chu enkawl dam ni tawhin, mi pahnihin an thihpui tawh thung.