Naktukah Tarun Gogoi vui dawn

Assam chief minister hlui, Thawh­ṭanni tlaia thi Tarun Gogoi chu naktuk, November 26 hian state chawimawina famkim nen vui a ni dawn. 

Nimin zing khan Tarun Gogoi ruang hi a thihna hmun, Gauhati Medical College and Hospital (GMCH) aṭanign Dispur-a a chenna inah lak a ni a, hemi hnu hian kum 15 chhung Chief Minister dinhmun a lo chelh tawhna, state secretariat Janata Bhawan-ah lak leh niin, tlai dar 3.30 khan state Congress headquarters Rajiv Bhawan-ah lak leh a ni. A ruang hi amah ngaisangtu mipuiten an thlah theihna turin mipui hmuh theih turin vawiin hian Gauhati-a Srimanta Sankardev Kalakshetra complex-ah dah a ni ang. 

Gogi hi an khua, Titabor-ah ni loin Guwahati-ah vui a ni dawn a, vuina hun hman a nih hma hian a thih hmaa a lo ngen tawh angin a ruang hi temple, mosque leh biak-inah kalpui a ni dawn a ni. A vuina hmun tur tak hi sawichian a la ni lo. Gogoi thlahna hun hmang tur hian central lama political leader eng emaw zat chu Assam-ah hian kal an tum a, Rahul Gandhi pawh kal tum zingah a tel.

President Ram Nath Kovind, prime minister Narendra Modi leh hruaitu hrang hrangten Gogoi an ui thu hi an sawi a, President Kovind chuan Assam hmasawnna atana a thawhna leh, an state chhunga helte  bei let a, dan leh thupek dinhmun siamṭha tura a beihna avangin Gogoi chu hriatreng a ni tawh dawn a ni, a ti.