Assam CM leh Meghalaya CM inbia
Assam chief minister Sarbananda Sonowal chuan Nilaini khan Meghalaya chief minister Conrad K Sangma chu telephone-a biain, Meghalaya kaltlanga Barak Valley-a bungrua phurh luh dan tur chung chang a sawipui.
Sarbananda Sonowal chuan Sangma hnenah hian Guwahati aṭanga Barak Valley district-a mipui mamawh bungruate harsatna awm loa phurh luh a nih theih dan ngaihtuahpui turin a ngen. Assam-a Covid-19 kai an pun chak avangin Meghalaya sorkar chuan Guwahati ramri, Ri-Bhoi district-a Byrnihat-Khanapara inkarah curfew a puang a ni. Curfew puanna bial hi Guwahati aṭanga Barak Valley pan tur motor-ten an tlan tlang a ngai a ni.
Meghalaya chief minister chuan Meghalaya kaltlanga Barak Valley leh hmarchhak state dang pantu, mipui mamawh phurtu motor-ten harsatna an tawh lohna tura hma lo lakpui a tiam. Nilaini khan Meghalaya-ah hian hri kai mi pali hmuh thar leh an ni a, hri kai enkawl mek hi mi 52 an awm a ni. Hri kai hmuh tawh zinga mi pahnihin an thihpui tawh a, mi 45 enkawl dam an ni tawh bawk.