Hill district-ah medical college hawn a ni thuai dawn : Manipur CM

Manipur chief minister N Biren Singh chuan Manipur-a Hill district-a medical college awmchhun tur chu sak mek niin, hawn a ni thei thuai dawn tih a sawi.

Kar liam taa Churachandpur district-a Hiangtam Lamka-a YPA General Headquarters Hall-a Zomi Council programme a hmanpuinaah CM chuan he thu hi a sawi a ni. CM chuan medical college main building hi zawhfel chiah ala ni lo a, zawhfel a nih hun chuan structure ropui tak ala nih tur thu a sawi a ni.

Henglep Road siamna turin North East Road Construction Development Scheme hnuaiah Rs vaibelchhe 115 sanction a nih thu sawi bawkin, a kaihhruai sorkar tharin ni 100 chhunga district tana hmasawnna hna thawh tur thawh hrang hrangte a sawi. Hemi rual hian mipuite thawhpuina lo chuan sorkarin engmah a ti thei lo tih a sawi nghal bawk.

Chief Minister chuan Jal Jeevan Mission hnuaiah chhungtin te tui thianghlim pekna turin hma lak mek a ni tih a sawi a, hmun 70-ah tube-well laih tum niin, Churachandpur-ah 50 leh Pherzawl-ah 20 chu 100 Days programme chhungah zawh hman an tum tih a sawi. Hemi chhung veka zawh hman turin amusement park chu district pasarih-ah siam mek a ni a, Ukhrul, Senapati leh Churachandpur-a mite chu hawn thuai beisei a ni, a ti.

Ruihhloin khawtlanga nghawng ṭha lo tak a neih dante sawiin, CM chuan ṭhalai leh naupang tam tak fahrahah a siam phah a ni tiin, ruihhlo ṭhat loh zia an hriatchian avangin sorkar pawhin ruihhlo do beihpui a thlak a ni, a ti. Ṭhalaite ruihhlo laka venhim an nih theihna turin, ruihhlo do hna thawh mekah mipuite pawh theihtawpa sorkar thawhpui turin a sawm.