Kawngpuia bawlhhlawh paihte sum chawi tir turin IMC hrilh

Gauhati High Court Itanagar Bench chuan Itanagar Municipal Corporation (IMC) hnenah kawngpuia bawlhhlawh paih leh, hnawmhnawk siam ṭhinte chu Solid Waste Management Rules, 2016 hnuaiah sum chawi tir ṭhin turin a hriattir.

IMC Mayor Tame Phassang chuan IMC huam huamchhunga bawlhhlawh sawngbawl dan mumal lo tak chungchanga activist, Takam Diring-a PIL thehluh a ngaihtuah hnuah, court chuan IMC hnena hriattirna hi a pe tih a sawi.

Court chuan Solid Waste Management Rules kenkawh dan chungchang ngaihtuahin town planning leh urban local body department hrang hrang, Itanagar capital region leh Papum Pare district-a deputy commissioner te, IMC commisisoner leh mayor-te chu kar khat chhunga joint meeting nei turin a hriattir nghal bawk a ni.

Phassang chuan khawpui vawn faina kawngah mipuite pawh theihtawp an chhuah a duh thu sawiin, mipuite nena theihtawp an chhuah chauhin khawpui vawn fai chu a hlawhtling thei dawn a ni, a ti. Karsinga leh Chimpu-ah bawlhhlawh sawngbawlna hmun siam mek a nih thu a sawi bawk.