Hmeichhe tana seat hauhsak hi danin a phût : Nagaland CM

Nagaland Chief Minister TR Zeliang chuan Urban Local Body (ULB) election neih tura hmeichhe tana seat 33% hauhsak chu India danpuiin a phut leh zawm ngei ngei tur niin a sawi.

CM Zeliang chuan, ULB election neih tura an party Naga People's Front (NPF) candidate-te meeting a neihpuinaah he thu hi a sawi. NPF hian Town Council election neihna tur - Shamator, Meluri, Phek, Aboi, Naginimora, Longkhim/Chare, Noklak, Pungro leh Kiphire-ah te candidate an thehchhuak dawn a, henga chuh tur candidate-te chu party head office, Kohima-ah meeting a neihpui a ni. Hmeichhe tana seat hauhsak chu India danpuiin a phut leh tih makmawh a ni a, candidate-te chuan an tih tur dik tak an ti a ni, a ti.

Zeliang chuan danin a phut angin hmeichhe tana seat hauhsak chu kalpui an nih thu sawiin, state sorkar chuan tih dik loh a neih loh thu a sawi. India danpui Article 371 A chuan hemi chungchang hi chiang takin a tarlang nia sawiin, chu chu State Legislative Assembly chuan bawhzuiin a hmang mai a ni, a ti. Parliament Act leh India danpui chu thliar hran thiam a pawimawh thu Zeliang chuan sawiin, Article 243 T chuan ULB election atana hmeichhiate seat hausak tur an nih thu hi chiang takin a tarlang a ni, a ti.

Nagaland-ah hian Febrary 1 khian Urban Local Body (ULB) election hi neih tura ruahman a ni a, hetih lai hian hmeichhe tana seat 33% hauhsak an nih avangin pawl hrang hrang ten an dodal a ni. Tribal pawl eng emaw zat chuan election hi an boycott tur thu an sawi tawh a, chuh tuma hming pe lut candidate-te chu inhnukdawk turin an ngen bawk. Candidate eng emaw zat chu an inhnukdawk tawh a, mahse Naga People's Front (NPF) chuan an party candidate-te chu an inhnuhdawh ve loh tur thu a lo puang tawh a ni.

Hetih lai hian Thawhlehni khan ULB election neih tura candidate-te inhnuhdawh theih hun chu a tawp a, candidate 140 zet an inhnukdawk. Candidate 535 zinga 140-te an inhuhdawh leh tak avang hian candidate 395 chauh an awm dawn a ni. Inhnuhdawh theih hun tawp ni hian, town leh municipal council 72 aṭangin, candidate 73 zet an inhnukdawk a ni. Chumukedima, Mangkolemba leh Chozuba town council-a candidate awm zawng zawngte (31)-te chu an inhnukdawk vek a, Phek (7), Meluri (4), Tuli (6), Shamator (1), Noklak (1), Bhandari (3), Zunheboto (2), Chozuba (12), Aboi (1) leh Wokha-a candidate (6)-te chu an inhukdawk bawk.

State chhung hmun eng emaw zatah buaina tenau a chhuak a, Phek District-ah chuan Section 144 CrPC puan niin, mi pathum aia tam punkhawm khap a ni.