Arunachal Pradesh-in Small and Micro Industry hmangin hma sawn thei : Union minister

Arunachal Pradesh chu small and micro industry hmanga tih hmasawnn theih niin, Union Minis­ter of State for Food Processing Industries Sadhvi Niranjan Jyoti chuan Thawhlehni khan a sawi.

Union Minister Jyoti hian Indian Chamber of Commerce (ICC) leh Union Ministry of Food Processing Industries-te'n ‘Arunachal Pradesh Food Pro’ programme an buatsaih a hmanpuinaah he thu hi a sawi a ni. Hmarchhak hmasawnna chu sorkar laipui ngaihpawimawh ber niin a sawi a, chumi tihlawhtling tur chuan hma lak mek a nih thu a sawi. India chuan hmarchhak tel loin hma a sawn thei lo a, hmasawnna chuan kil tin a thleng tur a ni, a ti. Hmarchhak hmasawnna turin Ministry of Development of North Eastern Region (DoNER) din a ni a, an hmalakna zarah hmarchhak chuan nasa takin hma a sawn chho mek zel a ni, a ti.

Niranjan Jyoti chuan, Prime Minister Narendra Modi pawhin hmarchhak hmasawnna a ngaipawimawh hle tih sawiin, hmarchhak tan bik programmme eng emaw zat duan a nih thu a sawi. Food processing industry chuan ram hmasawnna kawngah 13% zet a thawh tih sawiin, hmarchhak huam chhungah industry a tam thei ang ber din tura hmalak a ni, a ti. Arunachal Pradesh chuan agriculture, horticultural leh thil dangah te hma a sawn zel tih sawiin, food processing industry pawh din thuai a la ni dawn niin, Union Minister chuan a sawi. A bikin small and micro industry chu AP hmasawnna thlen theitu a ni a, an thlai thar ‘kiwi’ chu a quality a ṭhat thu sawiin, Germany leh New Zealand-a an thar chhuah ai pawha ṭha niin a sawi.

Union Minister chuan hmar­chhakah food park pali din a nih tur thu a sawi bawk.

Arunachal Pradesh Industries Minister Tamiyo Taga pawhin he hunah hian thu sawiin, small and micro industry chu state hmasawn nana thil pawimawh tak a ni, a ti. State mipui 94% zet chu agriculture leh a kaih­hnawiha eizawng an nih thu a sawi lang bawk.