Assam-ah Home Minister Amit Shah a zin

Union home minister Amit Shah chu Pathianni zan khan ni hnih cham turin Assam-ah a zin. A cham chhung hian Assam-a BJP sorkar kum khat tlin lawmna pawh a hmanpui dawn a, India-Bangladesh border pawh a tlawh dawn a ni.

Pathianni zan khan LGBI Airport, Guwahati-ah Amit Shah hi thlengin, Assam chief minister Himanta Biswa Sarma leh state BJP hruaituten an lo hmuak.

Home Minister hian nimin zing khan Mankachar border outpost tlawhin, he hmuna BSF official awmte a kawm a, temple-ah hun hmangin hemi hnu hian Tamulpur district-a Kelenchi-a Central Armed Paramilitary Force (CAPF) tana CENWOSTO-II (Central Workshop and Stores) siamna tur lungphum a phum leh a ni.

Hemi hnu hian Kamrup district-a Amingaon-a Census office hawng lehin, tlai lamah Gauhati Medical College and Hospital-a Superspeciality Cardiothoracic and Neurosciences Centre a hawng leh bawk.

Vawiinah Guwahati-ah Assam Police ceremonial parade a enpui dawn a, police headquarters-ah police official-te nen hun an hmang ho ang. Hemi zawh hian CM Sarma kaihhruai BJP sorkarin term hnihnain kum khat a tlin lawmna hun buatsaih chu a hmanpui dawn a ni. Vawiin tlaiah New Delhi lam a pan ang.