Nagaland : Sorkar school-a an fate kaltir turin ngen

Nagaland-a Youth Resources and Sports advisor Zale Neikha chuan nu leh pate chu sorkar school-ah an fate kaltir tura ngenin, sorkar school-ah chuan zirtirtu qualify leh training ṭha tak neite an awm a, naupangte zirtirna kawngah thiamna ṭha tak nei vek an ni, a ti.

Sorkar school-a zirlai naupang an tlem avang chuan private school aiin an ṭha lo zawk tihna a ni lo tiin, nu leh pa tam tak chuan ngaihdan dik lo tak neiin, sorkar school-ah zirna ṭha a awm lo nia ngaiin private school-ah fate kaltir chu an tum nghal ringawt niin a sawi. He thu hi Sakhabama-a Government High School building thar a hawnnaah a sawi a ni.

Neikha chuan sorkar school-ah chuan educational system hmasawnna turin scheme leh project hrang hrangte siam a ni ṭhin tih a sawi bawk. Hemi rual hian nu leh pate chu an fate zirna kawngah zirtirtute chungah mawhphurhna nghat vek lo tura chahin, an fate chu an theih anga in lamah pawh lo kaihruai zel turin a ngen bawk.