Hna thawh ṭhat tawk loh vangin TSECL-in hnathawk 24-te hlawh 40% hren sak

Tripura State Electricity Corporation Limited (TSECL) chuan an hnathawk zinga 24-te chu hna an thawh ṭhat tawk loh avangin an hlawh 40% a hrek sak tih managing director in-charge Debasish Sarkar chuan a sawi.

Sarkar chuan TSECL sub division 66 zinga 14-te chu hna a thawk ṭha tawk lo hle tih sawiin, ṭha zawka hna thawk tura thawktute nawrna atan official 24-te hlawh ṭhenkhat chu an hrek tih a sawi a ni. Tun hnaia power consumer-te bill an ennawnnaah, power consumer nuai 9.32 an neih aṭangin bill an pek hi 70% chauh an ni, a ti.

"Manager leh senior manager-te hlawh chu hren sak a ni a, an hlawh hi 'cut' sak tihna erawh a ni lo. Hei hi taima leh ṭha zawka thawktura nawrna a ni, an hnathawh dante a lungawi thlak hunah an hlawh hi pek chhuah kim a ni ang, " tiin a sawi.

Hetih lai hian corporation-a thawkte chuan hlawh hrek ṭhensak an ni chu dan kalh a ni tih an sawi.

Tripura Power Engineers Association general secretary Subir Chakraborty chuan corporation thiltih dan chu sorkar kaihhruaina dan siam kalh a ni tiin, "Dan piah lamah an che tur a ni lo," a ti. Bill pek dan a enfiah kawngah corporation chuan active connection chauh a chhut tur a ni tiin, temporary connection nena a chhut vek chu a dik lo tih a sawi a ni.