FASTOM-in Meghalaya CM hmuh phutin nawrh an huaihawt

Members of the Federation of All School Teachers of Meghalaya (FASTOM) chuan nimin khan an thil phut chungchangah chief minister Conrad K Sangma hmuh phutin Shillong-a Main Secretariat bulah nawrh an huaihawt.

Chief Minister hi Delhi-ah a zin lai a ni a, mahse FASTOM member-te hi tlai dar 3 thlengin nawrh hi an huaihawt tho a ni.

FASTOM thupuangtu, Mayborn Lyngdoh chuan Chief Minister Office-ah May 1 aṭang khan CM hmuh dilna hi an thehlut tawh a, tun thlengin hun pek an la ni lo tih a sawi. CMO hian state pawn lamah a zinchhuak tih pawh an hriattir lo tih a sawi bawk.

An thil phut chungchanga sawipui tura Chief Minister hi an hmu thei lo a nih chuan, May 12-ah Shillong leh Tura-ah lungawi lohna lantira rally neih an tum tih sawiin, "Main Secretariat-ah pawh kan thil phut tihhlawhtlin a nih hma chuan tiam chin awm loin sit-in protest kan huaihawt dawn bawk a ni," a ti.

FASTOM hian zirtirtu hlawh hi Rs 18,000-a tihsan bakah, kumtin increment 5% pek an phut a ni. A hmaa an thil phut zinga an telh, ad dhoc school teacher zawng zawnga deficit category-a hlankai erawh chu an sut leh a ni.